Добредојдовте на страницата за проектот "Корелација помеѓу младинските приоритети и официјалните политики"
Прогрес Институт за социјална демократија во соработка со Институтот за социлошки анализи го спроведува проектот “Корелација помеѓу младинските приоритети и официјалните политики”.
Општата цел на проектот е да се идентификуваат младинските политики и нивната ефикасност и соодветност, како и да се дојде до сознанија дали овие политики имаат влијание врз иселувањето на младите. Непостоење на корелација или меѓузависноист на официјалните младински политики со потребите на младите е аларм за интервенција во општеството со која би се решавале дел од проблемите на младите. Со реализирање на ова истражување се очекува да се добие јасна слика за суштинските (реалните) потреби на младите во Република Македонија и да се утврди дали реалните потреби на младите корелираат со официјалните младински политики, како и да се подигне свеста кај младите за овие прашања преку поттикнување на дебата.
Краткорочни цели на проектот се: Создавањеинструменти со кои би се споредувале и мереле ефектите од младинските политики и идентификување на нивните официјални приоритети и можности за решавање на проблемите на централно и на локално ниво; Детектирање на ефикасноста на системите (политички, економски, социјални) во општеството и нивната поврзаност во адресирање на младинските политики; Овозможување на јавна дебата и јавни настани на кои би се говорело за добиените сознанија од проектот, за мерките кои треба да се преземат за решавање на најгорливите проблеми со кои се соочуваат младите и мобилизирање на јавното мислење дека младинските политики мора да се во согласност со предизвиците на младите; Да се употребат сите општествени ресурси и општествена моќ за да се влијае врз процесот на креирање на младинските политики кои со својата контингентност ќе создаваат поквалитетни решенија во општествениот контекст.
Преку користење на методот на анализа на содржина се очекува да се добие првична слика за младинските политики во Република Македонија, нивниот фокус на интерес и средствата кои се издвојуваат за нивна реализација.
Интервјуата, анкетата и фокус групите треба да дадат слика за јавното мислење на младите за младинските политики, како и да се оцени степенот на нивно познавање на истите. Врз основа на податоците од спроведеното истражување (квалитативно и квантитативно) се очекува да се добијат и сознанија поврзани со причините поради кои младите ја напуштаат државата.
Организирањето на јавните дебати и јавни настани и поставувањето на блог се очекува да се мотивираат младите повеќе да дискутираат за проблемите со кои се соочуваат и на тој начин да ги актуелизираат своите приоритети.
Сето горенаведено ќе се искористи за да се понуди корисен инструмент за централната и локалните власти во креирањето на идните младински политики и негова дисеминација до пошироката јавност.
Времетраење на проектот: 18 месеци